واااااي فضائح بون صور ولافيديو

- ( وآآآي يا فضّيحة)


وحدوا الله..... لاإله إلا الله.
والّليّ عليه ذنب وخطية يقول أستغفر الله.
ولا يحلى الكلام إلى بذكر النبي عليه أفضل الصلاة والسلام.
اللهم صلي على محمد وعلى آله وصحبه الكرام.
كان ياما كان في قديم الزمان وسالف العصر والأوان. كان في رجّالْ إسمه عبدالوهاب ومرته سامية يبغوا يزوجوا بنتهم سميرة، وقاموا يستعدوا للفرح. قال عبدالوهاب : إيه رأيك نسوي الفرح في السطوح نفرشه وننصب الكوشة والذي منه . قالت سامّية: وآآآيّ يا فضّيحة لازم في سطوح الجيران أكبر وأشرح.قال: طيب حتسوي كُرْتِتْ{ فستان} زواج البنت عند الخياط إللّي جنبنا؟ قالت: وآآآي يا فضّيحة نسيب خياط الحارة المشهورة كدراجانة ونجي عند هذا المعفن اللّي خيوط الكرتة عنده تبان مليانة! قال: طيب العشا خمسة طليان تكفي ؟ قالت: أول الليّل نبغى تعتيمة{جبن وحلاوة وزيتون وشريك وغيره من النواشف} وفي آخر الليل عشا كوازي بالزبيب والوز المقمر والمكرونة.قال: ليه ما نسويه مخلوط أوفر لنا وأطعم ؟ قالت: وآآآيّ يا فضّيحة إيه يقولواعلينا الناس؟ وشوف فناجين الشاهي تجيبها أم راس مذهب وكاسات الموية قزاز.قال: طيب إيشبها السادة كمان ؟قالت: وآآآيّ يا فضّيحة إيش يقولوا علينا الناس . ولا تنسى الزلابية في يوم الصباحية, والله منيفة بنت خالها أحمد وأمينة بنت محمد وبنات عمها سراج وأسعد مو احسن منها . قال عبدالوهاب: ياشيخة أهلهم للآن بسددوا في الديون . قالت سامّية:أنا ماأفّهم يسير لبنّتي زيهم وأحسن أنا بأقلك على العموم. وهات تعٌد وتعدّد في طلبات لا لها أول من آخر. وكل ما قال لها شي قالت:
{{وآآآي يا فضّيحة لا ما يصير إش يقولوا علينا الناس}}
المهم خلاها عبدالوهاب تعد وتعدد وهات يا تبني وتهد,وشايلة هم كلام الناس وخايفة من الفضيحة وايش يقولوا عليها الناس .
عد عبدالوهاب الفضايح لقاها أكثر من الف ومية لو ما سوى زّي ما طلبت منه زوجته سامّية
طنت{طرأت} في راسه فكرة وراح على طول لبنته ينفذها، ولما عرفت البنت فكرة أبوها طلعت البنت عاقلة واتفاهم معاها على خطته, واعطى عريسها خبر بلي حيسويه في الليلة معاه . لبست البنت فستان أبيض بسيط و أتزينت وأخذت شنطة حوايجها بالدسّ عن أمها، وراحت مع أبوهاعلى بيت زوجها واتعشى الأبو معاهم, وسلم العروسة للعريس وأعطاهم قرطاس فيه مبلغ كبير من المال .وقال: الله يبارك لكم وهذه الفلوس أتوفرت لكم أشتروا بيها إللّي ناقص عليكم أواتّمشوا بيها إنتم أحرار ودعالهم ورجع على بيته.
استقبلته سامية وقالت له: فين باقي الدبش والأغراض, وسميرة ماهي في البيت أخذتها على فين ؟قال الأبو : خلاص وديت البنت على بيت زوجها وأتعشيت معاهم ورجعت.
قالت: وآآآيّ يا فضّيحة يا ندامة. إيه هذه الجوازة .؟فين أودي وجهي من الناس,قال لها: هذهِ فضيحة وحدة وتمت والحمدلله على خير وبركة وإنتِ عديت لي ألف فضيحة وفضيحة، الأفضل فضيحة وحدة ولا ألف فضيحة؟.
صاحت سامية وناحت .وبكت وولولت. وفي الأخير ما لقت قدامها إلا إنها تسكت وتنكتم وعلى فضايحها تزيد وحدة كمان، وبعد ما راقت وفّاقت, راحت بعد كم يوم على بيت بنتها سميرة تبارك لها زواجها إلا يا فضيحة ما فرحت بيه زّي ما تفرح كل أم عروسة مسرفة مبذرة , وديون على ظهر زوجها مركبة ...



وتوتة توتة فرغت الحدوتة .>>



لو كان بيتي قريب كان جبت لكم شوية لوز وزبيب




ولوكانت طاقية أنس ماهي مخروقة كان جيت لكم شوية مسلوقة.>>